30 octubre 2026

As mochilas viaxeiras xa están preparadas!

 

Un curso máis, as mochilas viaxeiras da nosa biblioteca poñen rumbo ás casas do alumnado para levar con elas un bo cargamento de historias, lecturas e momentos compartidos en familia.

Pero este ano hai unha novidade moi especial: no 3º ciclo de primaria foron os propios nenos e nenas os que escolleron os libros e os xogos que forman parte das mochilas!

Deste xeito, quixemos darlles protagonismo e permitir que os seus gustos, intereses e recomendacións tamén teñan un lugar nesta iniciativa. Porque quen mellor ca eles para propoñer aquelas lecturas e xogos que lles gustaría compartir cos compañeiros e coas súas familias?

As mochilas están pensadas para descubrir novas historias, xogar, conversar e gozar da lectura en compañía. Son tamén unha oportunidade para facer da lectura unha actividade compartida máis alá das portas da escola.

Agardamos que viaxen por moitos fogares, que se abran con curiosidade e que regresen cargadas de novas experiencias.

Porque ler en familia tamén é unha aventura!





01 octubre 2026

O noso cole está de aniversario: 50 anos, 50 historias!

 Este curso é moi especial para toda a comunidade educativa do CEIP ADR Castelao: o noso colexio cumpre 50 anos! Medio século de aprendizaxes, amizades, xogos, experiencias e lembranzas que forman parte da historia da nosa escola.

Para celebrar esta data tan importante, estamos preparando un novo mural conmemorativo que nos axude a lembrar os nosos comezos, poñer en valor todo o camiño percorrido e, sobre todo, facer visible que a historia do cole está construída polas persoas que pasaron e pasan cada día polas súas aulas.

Porque detrás destes 50 anos hai miles de historias: as do alumnado, as das familias, as do profesorado e as de todas aquelas persoas que contribuíron a facer do noso colexio o que é hoxe.

Baixo o lema «50 anos, 50 historias», queremos recuperar lembranzas, anécdotas, fotografías e vivencias que nos permitan reconstruír a memoria colectiva da escola.

Seguiremos compartindo os avances desta celebración. Temos moito que lembrar e, sobre todo, moito que celebrar!

Feliz 50 aniversario, CEIP ADR Castelao!