Libro para a Paz

Este libro xa foi recomendado na guía de lectura do Nadal " Tempo de Acivros Tempo de Libros"

Para conmemorar o Día Escolar da Non Violencia e a Paz, volvemos lembralo.

Mamá Cabra e Carmen Gil  publican o libro-disco A bruxa Discordia. Cancións para a paz na coleccción Sonárbore da Editorial Galaxia. As ilustracións son de Iria Fafián.

 A bruxa Discordia constitúe un álbum ateigado de valores positivos pensado e desenvolvido tendo en conta as necesidades dos nenos e nenas. Mensaxes como a importancia de compartir, de respectar ao próximo ou de convivir en harmonía escritas na súa propia linguaxe e transportadas a través dun dos vehículos máis eficaces: a música.
Material ben acaído para os primeiros lectores e para acompañar no Día da Paz.
Velaquí unha mostra das cancións que inclúe o libro-disco:

Baile da paz

Esta é a danza

da esperanza,

danza capaz

de sementar paz.

Ombro con ombro

pódese todo.

Dá un taconazo.

levanta o brazo

Colle a orella

da túa parella.

Faille cóxegas.

Ponte en crequenas.

Esta é a danza

da esperanza,

danza capaz

de sementar paz.

Agora dá un brinco,

ou mellor cinco!,

e tres palmadas

con gargalladas.

Logo ao compás

anda cara atrás.

E cara adiante,

coma un xigante.

Pinta un momento

paz no vento.

Grita un segundo:

"paz no mundo"e con donaire

dálle ao cú aire.

Outra novidade

Teño uns pés perfectos está publicado por Kalandraka con texto de María Solar e ilustracións de Gusti.

O personaxe principal , Melchor Sabichón, preséntase ao concurso Na busca do neno máis listo pero, malia ter preparado moitos temas, non esperaba enfrontarse a unha materia descoñecida: os pés. O protagonista atopará nun libro, que lle facilita a nai, todo canto necesita saber sobre esas extremidades inferiores: os tipos de pés, a súa anatomía e a función que cumpren para que poidamos camiñar e correr, o número de ósos que teñen, curiosidades sobre as unllas ou as pegadas que deixamos. Descobre, ao rematar o concurso, que o próximo pásanos moitas veces desapercibido.

Libro escrito con humor, destinado a lectores autónomos que queiran saber moito sobre pés.

Publicado en Rede Lectura.

Recomendación

Porque Cuqui non quere ir á lavadora, conto moi MOI IMPORTANTE para lerlles aos maiores antes de durmir

É o título do primeiro álbum da escritora María Lado , publicado en Apiario en 2014. As ilustracións son de Yanina Torres Tuirán.
Neste álbum, María Lado cóntanos o que lle acontece a Cuqui, un osiño de peluxe, dende a visión dun neno pequeno que cuestiona a sensibilidade das persoas adultas.
Este álbum ten interés para a lectura en familia e a través del podemos establecer vínculos afectivos coa lingua, tan necesarios hoxe.

A serie de Gatiño, con textos de Joel Franz Rosell e ilustracións de Constanza v. Kitzing.
E canto á Gatiño e as vacacións, cóntasenos que o último día, antes das vacacións, na clase de Gatiño, todos os animais contan a onde irán no verán; hai para todos os gustos: Parrula vaise con súa nai ao mar, Coella vai cos irmáns á casa do avós, Esquío parará a metade do tempo co pai e a metade coa nai e cámping, Ourizo vaise só a aprender idiomas a Inglaterra... pero Gatiño non sabe qué vai facer. Cando chega á casa pregunta e a resposta non pode ser mellor: non irán a ningunha parte “pasarémolo moi ben: papá, túa irmá, teu irmán, ti e máis eu... Serán unhas vacacións fantásticas!, porque imos estar todos... xuntos” di a nai.
Unha ensinanza, o valor de compartir o tempo, facendo o que sexa, sen necesidade de ir nin lonxe nin a un lugar distinto, estar xuntos.
Outra ensinanza, a presentación de todo tipo de familias e situacións e ningunha mellor que outra, simplemente distintas. O traballo coa memoria a través das repeticións...

Novidades editoriais

Rubicundo de María Canosa, vai dirixido aos máis pequenos. Trata da relación entre un vello e unha nena moi curiosa que non para ata adiviñar o que fai Rubicundo cada noite cando sae da casa, montado nunha bicicleta, enriba da árbore do seu xardín. Non deixará de sorprendernos o oficio deste home e o final, un final de afectos e esperanza. Esta obra, ilustrada por Nuria Díaz, resultou finalista do premio Merlín, na súa última convocatoria.

O corazón da maxia de Xavier Estévez e ilustrado por Santi Gutiérrez, remítenos a ese mundo paralelo (que tentamos descoñecer) dos nenos e nenas enfermas e hospitalizadas. A protagonista ten unha enfermidade grave, que toma con moita filosofía, repartindo alegría pola planta tan pronto se atopa con algo de forza. O tempo compartido con outra pequena na habitación, a necesidade de contarlle un conto para defendela do medo, dan lugar a unha historia que camiña á par da real, onde dúas rapazas parten na busca dos dragóns para salvar as aldeas. Porque os dragóns fan que o mundo continúe sendo como sempre foi, achegan a seguridade de que nada malo vai pasar e hai que rescatalos, estean onde estean... e nesas andan as nosas rapazas.

Eu curareite dixo oso pequeno.

Eses dous amigos, que xa tamén o son nosos, móvense polo universo de Janosh. 
"Un día tigre pequeno regresou do bosque coxeando, xa non podía camiñar máis nin manterse en pé e caeu.E quedou alí tombado no chan, no medio do prado.Deseguida chegou correndo oso pequeno e preguntoulle:

–Que che pasa, tigre pequeno? Estás enfermo?

- Eu curareite, dixo oso pequeno"


As personaxes máis entrañables da literatura infantil continúan xuntas. Se sempre se prestaron coidados, agora fano máis, pois os amigos están para iso: para axudarse cando se necesita. Tenrura e humor, diálogos dunha sinxeleza universal e a dozura .É a amizade!!!!!!

EDITORIAL WEEBLE. LIBROS GRATUÍTOS PARA LER NA PANTALLA

A editorial Weeble preséntase como un pequeno grupo de nais e pais que deron paso a unha rede de persoas comprometidas coa educación e dispostas a investir o seu tempo na creación de libros infantís para ler pantalla ou descargalos. Escriben, ilustran e traducen.
Xa hai algúns libros escritos en galego. Así, podemos acceder a Viaxe ás estrelas, A miña primeira viaxe ao sistema solar,... e varios máis que verán a luz nas próximas semanas.
Alguén máis se anima a traducir? Ou a ilustrar?
A iso chámaselle voluntariado lingüístico!
Porque hai xente que pon estes recursos a disposición de todos e todas, gratuitamente. Para que contemos con maís recursos informativos en formato dixital, e na nosa lingua.

Novo libro

A mamá que perdeu as cóxegas. de Clara do Roxo con ilustracións de Ana Francisco de Jorge Vázquez.

Velaquí unha historia sobre unha familia na que unha nai, experta en rir e rir e rir gozando das cóxegas, xa non o fai. Que será o que lle pasa?, por que non dorme polas noites?, que é o que lle preocupa? Como en tantas ocasións, serán os pequenos da casa os que inicien unha investigación que consiga aclarar como é que mamá perdeu as cóxegas. E, sobre todo, por que.

Unha historia pensada para nenos e nenas a partires de 10 anos.

Novo libro

Bieito Dubidoso de Roque Cameselle na colección Milmanda de Xerais.

Bieito Dubidoso, o mago de Tui, xa chegara a nós nun formato dirixido aos pequenos, pero faino agora en forma de novela xuvenil para mostrarnos o horror medieval da man do bispo Xoán, dono e señor da vila con poder absoluto e malas artes. O fermoso e cruel bispo está disposto a mil estratexias para acabar cos de Bieito. Un neno e unha moza chegada do lonxano Norte, Bieito e Destreza, que maduran mentres descubren o amor e a perda das persoas queridas. Rede lectura. Asesoría Bibliotecas Escolares.