PODCAST: LENDAS CON RAÍCES GALEGAS

 Este curso a rapazada de 3º ciclo estivo fedellando coa radio de polos creativos. Aquí tedes un Podcast realizado polos compañeiros de 6º de E.P. sobre lendas galegas.

COLABORACIÓN FAMILIAS

 Durante este curso recibimos a visita de varias familias que viven en Rianxo pero proceden doutros países. 

Por exemplo,  Mervys, mamá de Mathías, da aula de 4 anos B veu falarnos de Cuba. 

Anna Sylwia Teodorczyk, nai de León e Noel, veu falarnos do seu país, Polonia.

BIBLIO CREATIVA: ESCULTURAS ESTILO GIACOMETTI

 Onte e hoxe a rapazada de 4° de E.P. desfrutou dun obradoiro de esculturas de papel estilo Giacometti levado a cabo pola artesá Elektra.

Elaboraron diferentes esculturas que logo servirán para elaborar diferentes vontos e historias.

ALFABETIZACIÓNS MÚLTIPLES

 Aquí tedes algúns exemplos dos traballos de investigación realizados durante o curso.

EMPREGANDO A RADIO ESCOLAR

 Este curso seguimos experimentando coa radio escolar.

O alumnado de 5º de Educación Primaria participou nun programa de podcasts escolares chamado "Petiscos de Galicia" que pretende compartir as propostas gastronómicas das diferentes zonas. Eles elaboraron a receita da empanada milla de berberechos con cuncha. Na imaxe tedes un enlace a dito podcast. Despois tamén elaboraron a receita na cociña. A empanada estaba riquísima.

A rapazada de 6º de Educación Primaria animouse a recitar uns anacos de poemas de Rosalía de Castro.

CLUB DE LECTURA: ROTEIRO LITERARIO

 Este mes os participantes do Club de Lectura do cole visitaron a Fundación Camilo José Cela de Padrón e realizaron un roteiro literario pola vila.

CLUB DE LECTURA

 Este ano realizamos a actividade Clubs de Lectura no terceiro ciclo.

Creamos un Club de lectura chamado "Xoubaléate".

 Fixemos dous grupos debido ao gran número de rapaces e rapazas que se quixeron anotar. Un grupo de 5º e outro de 6º.

Cada grupo  leu dous libros, un en galego e un en castelán.

A actividade tivo bastante aceptación entre a rapazada.

AS FAMILIAS CONTAN

 Outro ano máis levamos a cabo a actividade "As familias contan". Familias colaboradoras viñeron ata o cole contarlles un conto á aula dos seus fillos.

Aquí temos varios exemplos.

MOCHILAS VIAXEIRAS: EXPOSICIÓN

Aquí tedes unha mostra das postais tan bonitiñas que fixeron os rapaces e rapazas que participaron na actividade das Mochilas viaxeiras. 

Moitas grazas familias por participar!

CELEBRACIÓN LETRAS GALEGAS 2026

 Hoxe celebramos o Día das Letras Galegas no cole. Organizamos un pequeno acto onde os nenos e nenas de 6° falaron sobre a vida e obra de Begoña Caamaño. Tamén desfrutamos de varias actuacións de alumnos e alumnas do cole que pertencen a dúas asociacións de baile moi coñecidas en Rianxo,  Vai de roda e Fogo Fatuo. Tivemos a colaboración de varios integrantes de Fogo Fatuo que nos tocaron varias pezas.

Que ben o pasamos!

No cole elaboramos un mural titulado "Saca a lingua pola túa fala". Moitas grazas familias pola vosa colaboración.

LETRAS GALEGAS 2026: BEGOÑA CAAMAÑO

 Aquí deixamos enlaces de diferentes actividades propostas polo Seminario Galán. Atoparedes actividades para imprimir e tamén moitas actividades para face en liña.

Picade na imaxe.

A continuación podedes ver un vídeo elaborado polo alumnado do Ceip San Pío X (Ourense).

Tamén tedes aquí un enlace a un  Pasapalabra elaborado polos membros do EDLG do cole.

Por último, tedes unha canción creada polos compañeiros e compañeiras  do  CEIP Emilia Pardo Bazán, da Coruña, sobre a vida e obra de Begoña Caamaño 

CONTACONTOS DE KALANDRAKA

 Hoxe tivemos un contacontos moi especial. Recibimos a visita do grandísimo Paco Nogueiras que estivo cos pequerrechos de Educación Infantil. 

Escoitamos, cantamos e bailamos, 

que ben o pasamos!

VISITA DE AUTORES: TOÑO NÚÑEZ

 Hoxe recibimos a visita de Toño Núñez. Estivo cos nenos e nenas de 5° de E.P. que leron o libro O monstro dos Ancares.

Moitas grazas Toño pola túa visita!

VISITA DE AUTORES: ANXO FARIÑA

 Hoxe o escritor e ilustrador Anxo Fariña estivo coa rapazada de 4° de E.P. Estivo falándolles do seu libro A escola robot.

Moitas grazas Anxo. Gustounos moito a túa visita!

FESTA DO MAIO

 Hoxe celebramos a festa do maio. Outro ano máis elaboramos un precioso maio co material traído polo alumnado. 

A rapazada de terceiro ciclo foi a encargada de colocar o fiuncho e logo as demais aulas colaboraron na elaboración dos adornos.

Tamén crearon unhas coplas que recitaron os nenos e nenas de 5° de E.P. na xuntanza que fixemos despois do recreo.

ACTIVIDADES SEMANA DO LIBRO

 Hoxe celebramos o día do libro cos Apadriñamentos e amadriñamentos lectores.

Durante a Hora de ler e parte da cuarta hora varios grupos de  maiores de 5° e 6° estiveron léndolles un conto aos pequerrechos de E. Infantil. 

Pasaron un momento moi agradable.

Os pequerrechos de Educación Infantil realizaron coas súas familias a actividade "Cada maleta un destino". Aquí tedes o resultado. Quedounos un mural ben xeitosiño, verdade? Graciñas familias pola vosa colaboración.

Ademais, durante esta semana, algunhas aulas realizaron "Lecturas ao sol" aproveitando o bo tempo.

Tamén elaboramos un mural con portadas de libros do mundo e a rapazada de 5° de E.P. realizou diferentes deseños con libros retirados.

CHARLAS 8M

 Seguimos coas charlas de nais do alumnado.

Durante estas semanas a rapazada de 5° desfrutou de varias visitas. 

Primeiro tiveron a visita de Laura Muñiz, nai de Ana de 5° B, que é policía xudicial.

Logo ven visitarnos Darlenys Liriano, militar e nai de Aisha de 5°C.

Por último recibiron a visita de Anna Teodorczyc, nai de León de 5° C. Anna é de Polonia e estivo contándolles moitas cousas interesantes sobre o seu país.

Moitas grazas a todas pola vosa colaboración!

CHARLA SOBRE O AUTISMO

 Hoxe recibimos a visita de Mila Torrado, secretaria da asociación BarbanTEA e autora do libro "Vítor é autista". 

Estivo toda a mañá cos diferentes cursos de primaria explicándolles aos nenos e nenas o seu libro e tamén certas características que presentan as persoas con TEA.

Moitísimas grazas Mila, volta cando queiras!

PRESENTACIÓN E ROSCO SOBRE ESCRITORAS POLO MUNDO (8M)

 Aquí tedes a presentación realizada a partir da información recollida do mural das escritoras do mundo.

 E agora un rosco de preguntas sobre dita presentación.

VISITA Á MOSTRA "CASTELAO GRAFISTA ( FACSÍMILE)

 Esta semana a rapazada de 5° e 6° baixou ata o Auditorio de Rianxo a ver unha mostra sobre Castelao que está levando a cabo a Fundación Abanca. Repartidos en pequenos grupos, puideron analizar algúns dos debuxos do autor.